Студентите од Електротехнички факултет при Универзитет „Гоце Делчев“ – Штип реализираа дводневна теренска настава под менторство на професорите Тодор Чекеровски и Сашо Гелев.

Ден 1 (11.4.2024 г.): Наставата започна во Ветерниот парк „Богданци“, каде што студентите имаа можност да се стекнат со практични и теориски знаења поврзани со искористувањето на ветерната енергија за производство на електрична енергија. Од таму студентите се упатија кон РЕК Битола каде што се запознаа со начинот на работа на термоелектраната.

Ден 2 (12.4.2024 г.): Наставата се одвиваше во Хидролошката станица кај браната „Глобочица“ и Хидроелектраната „Глобочица“, каде што студентите имаа можност да се запознаат со работата на системот и контролната станица за далечинско управување преку SCADA. Теренската настава заврши со посета на РЕК „Осломеј“, каде што студентите можеа да видат каде се ископува јагленот и да ја видат новата фотоволтаична централа.